ՍՈՎՈՐԵԼ. ԳՈՐԾԵԼ. ՀԱՄԱՍՏԵՂԾԵԼ
Փոփոխություններ ընտրական օրենսգրքում. ընտրական գործընթացը արտակարգ և ռազմական դրության ժամանակ
Կառավարությունը հանդես է եկել «Հայաստանի Հանրապետության ընտրական օրենսգիրք» սահմանադրական օրենքում փոփոխություններ նախատեսող նախագծով։ Նախագծի առանցքում է ընտրությունների նշանակման և անցկացման վերաբերյալ կարգավորումները ռազմական և արտակարգ դրության ժամանակ։ Նախագիծը հնարավորություն է տալիս չեղարկել Ազգային ժողովի կամ տեղական ինքնակառավարման մարմինների ընտրությունները, եթե ռազմական կամ արտակարգ դրություն է հայտարարվել քվեարկությունից հետո, սակայն մինչև ընտրությունների քվեարկության նախնական արդյունքները ամփոփելու և դրանք արձանագրությամբ վավերացնելու պահը։ Վենետիկի հանձնաժողովը բացասական կարծիք է հայտնել նման կարգավորման վերաբերյալ և առաջարկել է ընդհանրապես հանել այս կարգավորումը նախագծից, քանի որ ընտրողների կամքի արտահայտումից հետո այն պետք է հարգվի և պաշտպանվի։
