ՍՈՎՈՐԵԼ. ԳՈՐԾԵԼ. ՀԱՄԱՍՏԵՂԾԵԼ
Ազգային ժողովի ընտրություններին և հանրաքվեին մասնակցելու իրավունքը սահմանափակող նախագծերի փաթեթի սահմանադրականության վերաբերյալ
Սույն վերլուծությունն ուսումնասիրում է «Քաղաքացիական պայմանագիր» խմբակցության մի շարք պատգամավորների կողմից շրջանառության մեջ դրված օրենսդրական փաթեթի սահմանադրականությունը, որով առաջարկվում է Ազգային ժողովի ընտրություններին և հանրաքվեներին մասնակցելու իրավունքը պայմանավորել նախորդ 365 օրվա ընթացքում Հայաստանի Հանրապետությունում առնվազն 183 օր փաստացի գտնվելու հանգամանքով։ Վերլուծությունը եզրակացնում է, որ առաջարկվող կարգավորումն անհամատեղելի է Հայաստանի Հանրապետության Սահմանադրության 48-րդ հոդվածի 1-ին մասի հետ, որն ընտրելու իրավունքի իրականացման պայմաններ է սահմանում բացառապես քաղաքացիությունն ու տարիքը՝ օրենսդրին չթողնելով որևէ մնացորդային հայեցողություն լրացուցիչ նյութական նախապայմաններ սահմանելու համար։ Անհամատեղելիությունը հաստատվում է նաև Սահմանադրության 48-րդ հոդվածի համակարգային մեկնաբանությամբ, 48-րդ և 181-րդ հոդվածների համեմատական վերլուծությամբ, ինչպես նաև 75-րդ և 80-րդ հոդվածների կիրառությամբ, որոնք օրենսդրի լիազորությունը սահմանափակում են հիմնարար իրավունքների արդյունավետ իրականացման կազմակերպական ու ընթացակարգային կառուցակարգերի սահմանմամբ և բացարձակ կերպով արգելում են դրանց էության խաթարումը։ Վերլուծությունն արձանագրում է նաև, որ առաջարկվող կարգավորումը չի համապատասխանում Վենետիկի հանձնաժողովի՝ ընտրական հարցերում և հանրաքվեների վերաբերյալ բարենպաստ գործունեության կանոնագրքերին, որոնք բնակության տևողության պահանջը թույլատրում են բացառապես տեղական ընտրությունների և տեղական հանրաքվեների համատեքստում։
