Եղիշե Կիրակոսյանը 2002 թ-ին ավարտել է ԵՊՀ իրավագիտության ֆակուլտետի բակալավրիատը, 2004 թ-ին` նույն ֆակուլտետի մագիստրատուրան` միջազգային իրավունք մասնագիտացմամբ:

2010 թ-ին Եղիշե Կիրակոսյանն ավարտել է Ջորջթաունի համալսարանի իրավունքի կենտրոնը (Վաշինգթոն, ԱՄՆ)` ստանալով միջազգային իրավունքի մագիստրոսի աստիճան: 2006 թ. սեպտեմբերին Եղիշե Կիրակոսյանը հաջողությամբ պաշտպանել է «Սովորույթը ժամանակակից միջազգային իրավունքում» թեմայով թեկնածուական ատենախոսությունը` ստանալով իրավաբանական գիտությունների թեկնածուի գիտական աստիճան:

2008 թ. սեպտեմբերից վարչապետի օգնական է, նաև` Երևանի պետական համալսարանի իրավագիտության ֆակուլտետի Եվրոպական և միջազգային իրավունքի ամբիոնի դասախոս: Ուսանողական տարիներին Եղիշե Կիրակոսյանը մասնակցել է բազմաթիվ գիտական կոնֆերանսների և դատախաղերի (Ֆ. Ջեսափի անվան միջազգային իրավունքի դատախաղ):

Հեղինակ է ավելի քան 10 գիտական հոդվածների: 2009-ին հրատարակվել է նրա առաջին մենագրությունը` «Սովորույթը ժամանակակից միջազգային իրավունքում» վերնագրով (ռուսերեն): Եղիշե Կիրակոսյանը Միջազգային իրավունքի հայկական ընկերակցության, Միջազգային իրավունքի ամերիկյան ընկերակցության և Միջազգային իրավունքի ռուսական ընկերակցության անդամ է:

Գիտական հետաքրքրության ոլորտներն են` միջազգային հանրային իրավունք, միջազգային քրեական իրավունք, ինքնորոշումը միջազգային իրավունքում, միջազգային պայմանագրերի իրավունք, միակողմանի անջատում, մարդու իրավունքների միջազգային իրավունք, միջազգային մարդասիրական իրավունք, ուժի կիրառումը միջազգային իրավունքում, վեճերի կարգավորում, առևտրային արբիտրաժ, միջազգային ներդրումային իրավունք:

Տարոն Սիմոնյանը 2007 թ-ին գերազանցությամբ ավարտել է ԵՊՀ իրավագիտության ֆակուլտետը, 2009 թ-ին` նույն ֆակուլտետի մագիստրատուրան: 2009 թ-ին Տարոն Սիմոնյանը մասնակցել է Թաֆթս համալսարանի Ֆլետչերի իրավունքի և դիվանագիտության դպրոցի վերապատրաստման ծրագրին (Միջազգային իրավունք և Իրավաբանական հետազոտություններ): Երևանի պետական համալսարանի Պետության և իրավունքի տեսության ու պատմության ամբիոնի ասպիրանտ է:

Ուսանողական տարիներին Տարոն Սիմոնյանը մասնակցել է մի շարք գիտական միջոցառումների, այժմ հետազոտություն է իրականացնում «Անկայուն և անցումային հասարակական համակարգերի և դրանց պետականության զարգացման առանձնահատկությունները (սիներգետիկ մոտեցում)» թեմայով:

Գիտական հետաքրքրության ոլորտներն են` պետաիրավական խնդիրների միջառարկայական մոտեցումը (պրակտիկ-տեսական, պատմական, սոցիալ-քաղաքական, համեմատական), միջազգային և ներպետական իրավունքի փոխազդեցության հիմնախնդիրները, հայկական պետականության դինամիկ փոփոխությունները, միջազգային իրավունքի դինամիկային առնչվող հիմնախնդիրներ:

Ռուբեն Մելիքյանը 2001 թ-ին ավարտել է ԵՊՀ իրավագիտության ֆակուլտետը, 2003 թ-ին` մագիստրատուրան: 2006 թ-ին հաջողությամբ պաշտպանել է «Վերաքննությունը Հայաստանի Հանրապետության քրեական դատավարությունում» թեմայով թեկնածուական ատենախոսությունը` ստանալով իրավաբանական գիտությունների թեկնածուի գիտական աստիճան: 2008 թ-ին մասնակցել է Թաֆթս hամալսարանի Ֆլետչերի իրավունքի և դիվանագիտության դպրոցի վերապատրաստման ծրագրին:

2003 թ-ից սկսած` Ռուբեն Մելիքյանը դասախոսում է Երևանի պետական համալսարանի իրավագիտության ֆակուլտետում` Քրեական դատավարության և կրիմինալիստիկայի ամբիոնում:

2009 թ-ից ՀՀ վճռաբեկ դատարանի նախագահի խորհրդատու է: Հեղինակ է երկու տասնյակից ավելի գիտական հոդվածների: 2007 թ–ին լույս է տեսել Ռուբեն Մելիքյանի մենագրությունը` «Վերաքննությունը ՀՀ քրեական դատավարությունում» վերնագրով: Ռ. Մելիքյանը համահեղինակել է նաև մի շարք գիտաուսումնական և գիտագործնական աշխատություններ:

Գիտական հետաքրքրության ոլորտներն ընդգրկում են` քրեական դատավարությունը, դատական համակարգի կազմակերպման և գործունեության հիմնախնդիրները, Մարդու իրավունքների Եվրոպական դատարանի գործունեությունը, իրավական մեթոդաբանությունը եւ համեմատական իրավագիտությունը:

Արամ Օրբելյանը 2005 թ-ին գերազանցությամբ ավարտել է Միջազգային հարաբերությունների Մոսկվայի պետական ինստիտուտի (համալսարան) Միջազգային իրավունքի ֆակուլտետը: 2008 թ-ին հաջողությամբ պաշտպանել է «Ուժի գործադրումը ժամանակակից միջազգային հարաբերություններում» թեմայով թեկնածուական ատենախոսությունը` ստանալով իրավաբանական գիտություների թեկնածուի գիտական աստիճան:

2009 թ-ից Արամ Օրբելյանն աշխատում է "Concern-Dialog" իրավաբանական գրասենյակում` որպես գործընկեր, փոխտնօրեն, այնուհետեւ` գլխավոր իրավաբան: Միաժամանակ դասավանդում է Ռուս-հայկական (Սլավոնական) համալսարանում (միջազգային և եվրոպական իրավունքի ամբիոն): Արամ Օրբելյանը Ռուսաստանյան միջազգային իրավունքի ընկերակցության անդամ է, ՀՀ Փաստաբանների պալատի անդամ, Միջազգային իրավունքի հայկական ընկերակցության անդամ և Միջազգային հարաբերությունների Մոսկվայի պետական ինստիտուտի (համալսարան) շրջանավարտների միության անդամ:

Գիտական հետաքրքրության թեմաներն են` միջազգային hանրային իրավունք, ուժի գործադրումը միջազգային իրավունքում, անվտանգությունը և միջազգային իրավունքը, ինքնորոշման իրավունք, համեմատական վարչական իրավունք, վեճերի կարգավորում, վեճերի այլընտրանքային կարգավորում:

Վլադիմիր Վարդանյանն ավարտել է Երևանի պետական համալսարանի իրավագիտության ֆակուլտետը, հաջողությամբ պաշտպանել է «Ցեղասպանության համար պետությունների պատասխանատվության հիմքերը» թեմայով թեկնածուական ատենախոսությունը` ստանալով իրավաբանական գիտությունների թեկնածուի գիտական աստիճան:

Սկսած 2006 թ-ից` Վլադիմիր Վարդանյանը ՀՀ Սահմանադրական դատարանի աշխատակազմի իրավախորհրդատվական ծառայության Միջազգային պայմանագրերի բաժնի վարիչն է, նաև դասավանդում է Երևանի պետական և Ռուս-հայկական (Սլավոնական) համալսարաններում: Հեղինակ է միջազգային և սահմանադրական իրավունքների վերաբերյալ ավելի քան 20 գիտական հոդվածների:

Գիտական հետաքրքրության ոլորտներն են` «Ցեղասպանություն» հանցագործության վերաբերյալ միջազգային իրավական մոտեցումները, պետությունների պատասխանատվությունը, միջազգային քրեական իրավունքը, միջազգային մարդասիրական իրավունքը, միջազգային պայմանագրերի իրավունքը, ինչպես նաև` մարդու իրավունքների միջազգային իրավունքը:

Լևոն Գևորգյանը 2006 թ-ին ավարտել է Երևանի պետական համալսարանի իրավագիտության ֆակուլտետը, 2008 թ-ին` նույն ֆակուլտետի մագիստրատուրան` միջազգային իրավունք մասնագիտացմամբ: 2010 թ-ին ավարտել է Ամերիկյան համալսարանի Վաշինգթոնի իրավունքի քոլեջը (Վաշինգթոն, ԱՄՆ)` ստանալով մագիստրոսի կոչում: Երևանի պետական համալսարանի Եվրոպական և միջազգային իրավունքի ամբիոնի ասպիրանտ է:

2008 թ. սեպտեմբերից մինչև 2010 թ. հոկտեմբերը Լեւոն Գևորգյանն աշխատել է ՀՀ Արդարադատության նախարարության Մարդու իրավունքների եվրոպական դատարանի հետ կապերի վարչությունում:

2010 թ-ի հոկտեմբերից Լևոն Գևորգյանն աշխատում է «Հարությունյան և գործընկերներ» իրավաբանական գրասենյակում` որպես իրավաբան: Լևոն Գևորգյանն աշխատել է նաև Միջազգային հանրային իրավունքի և քաղաքականության խմբում (ԱՄՆ) և ՄԱԿ-ի քարտուղարության իրավական գործերի գրասենյակի կոդիֆիկացիայի բաժնում:

Գիտական հետաքրքրության ոլորտներն ընդգրկում են տարածքային վեճեր, ինքնորոշում, մարդու իրավունքներ, միջազգային քրեական իրավունք, պետությունների պատասխանատվություն, անջատում, հետ-գաղութային ինքնորոշում և uti possidetis:

Սուրեն Սարգսյանն ավարտել է Երևանի պետական համալսարանի իրավագիտության ֆակուլտետի բակալավրատը (2003), 2007 թ-ին ավարտել է Հայաստանի ամերիկյան համալսարանը` ստանալով մագիստրոսի կոչում: 2010 թ-ին Սուրեն Սարգսյանն ավարտել է Թաֆթս համալսարանի Ֆլետչերի իրավունքի և դիվանագիտության դպրոցը` ստանալով մագիստրոսի աստիճան (միջազգային իրավունք և միջազգային հարաբերություններ):

Սուրեն Սարգսյանն աշխատել է մի շարք կառավարական, ինչպես նաև ոչ-կառավարական կազմակերպություններում` Հայաստայան իրավաբանների միություն, ՀՀ ֆինանսների և էկոնոմիկայի նախարարություն: Այժմ Սուրեն Սարգսյանը աշխատում է ՀՀ նախագահի աշխատակազմի իրավաբանական վարչությունում` որպես գլխավոր մասնագետ:

Գիտական հետաքրքրության ոլորտներն են` ուժի գործադրում, վեճերի կարգավորում, ինքնորոշման իրավունք, խաղաղապահական առաքելությունները և վեճերի կարգավորում, միջազգային հարաբերություններ և դիվանագիտություն:

Սառա Շիրազյանն ստացել է Երևանի պետական համալսարանի իրավագիտության ֆակուլտետի բակալավրի (2004) և մագիստրոսի (2006) կոչում: 2006թ-ին ավարտել է Լոնդոնի համալսարանը (University College London և School of Oriental and African Studies)` ստանալով մագիստրոսի աստիճան:

2008թ-ին մասնակցել է Թաֆթս համալսարանի Ֆլետչերի իրավունքի և դիվանագիտության դպրոցի վերապատրաստման ծրագրին: Ներկայումս Սառա Շիրազյանը Երևանի պետական համալսարանի իրավագիտության ֆակուլտետի հայցորդ է (միջազգային իրավունք):

Նա Բաց հասարակության ինստիտուտի հետազոտող է, նաև դասավանդում է Երևանի պետական համալսարանի իրավագիտության ֆակուլտետի եվրոպական և միջազգային իրավունքի ամբիոնում (Մարդու իրավունքների պաշտպանության միջազգայի մեխանիզմները և միջազգային իրավունքը): Սառա Շիրազյանը համագործակցել է մի շարք միջազգային կազմակերպությունների հետ, մասնավորապես` Ամերիկյան իրավաբանների ասոցացիայի, ԵԱՀԿ հայաստանյան ընտրությունների հետազոտման առաքելության, ԵԱՀԿ ռազմաքաղաքական ծրագրի և այլն: Ներկայումս աշխատում է Ամերիկյան իրավաբանների ասոցիացիայի քրեական իրավունքի բարեփոխման ծրագրում:

Գիտական հետաքրքրության ոլորտներն են` Միջազգային հանրային իրավունք, միջազգային քրեական իրավունք, միջազգային առևտրային և բնապահպանական իրավունք, միջազգային դատարանների և տրիբունալների քաղաքականություն և այլն:

Արմենուհի Գառգալոյանը 2006 թ-ին գերազանցությամբ ավարտել է Երևանի պետական համալսարանի իրավագիտության ֆակուլտետը, 2008 թ-ին ստացել է մագիստրոսի կոչում: 2010 թ-ին մասնակցել է Թաֆթս համալսարանի Ֆլետչերի իրավունքի և դիվանագիտության դպրոցի վերապատրաստման ծրագրին (միջազգային հարաբերություններ և արտաքին քաղաքականություն): Ներկայումս Արմենուհի Գառգալոյանը Երևանի պետական համալսարանի իրավագիտության ֆակուլտետի եվրոպական և միջազգային իրավունքի ամբիոնի հայցորդ է:

Նա համագործակցել է մի շարք միջազգային կազմակերպությունների հետ` ՄԱԿ-ի փախստականների գրասենյակ, Ամերիկյան իրավաբանների ասոցիացիա: Ուսանողական տարիների ընթացքում Արմենուհի Գառգալոյանը մասնակցել է մի շարք ծրագրերի և դատախաղերի միջազգային և եվրոպական իրավունքի շրջանակներում, մասնավորապես` Ֆ. Ջեսսափի անվան միջազգային իրավունքի դատախաղի միջազգային մրցափուլերին:

Գիտական հետաքրքրության ոլորտներն են միջազգային պայմանագրային իրավունքը, միջազգային քրեական իրավունքը, մարդու իրավունքների միջազգային պաշտպանությունը, պետությունների և միջազգային կազմակերպությունների պատասխանատվությունը, ուժի գործադրումը:

Հայկ Կուպելյանցը Գերազանցությամբ ավարտել է Հայաստանում ֆրանսիական համալսարանը` և Փարիզի Jean-Moulin Lyon III համալսարանը: Ներկայումս ներգրավված է նույն համալսարանների մագիստրոսական ծրագրերում` Միջազգային գործարարական իրավունք (թեմա` Միջազգային առևտրային արբիտրաժում ինքնավարության և այդ ուղղությամբ Հայաստանում իրականացվող բարեփոխումների վերլուծություն):

Իր մասնագիտական գործունեությունը Հայկ Կուպելյանցն սկսել է Մարսելի իրավաբանական գրասենյակներից մեկում` որպես փորձնակ: Այժմ աշխատում է «Գրիգորյան և գործընկերներ» իրավաբանական գրասենյալում: Հեղինակ է մի շարք գիտական հոդվածների, ինչպես նաև անդամակցում է Հայաստանի Հանրապետության Հանրային խորհրդի պետության և իրավական հարցերով հանձնաժողովին: Հայկ Կուպելյանցը «Լույս» հիմնադրամի կրթաթոշակառու է:

Գիտական հետաքրքրության ոլորտներն են` իրավունքների կոնֆլիկտ (կոլիզիա), միջազգային առևտրային արբիտրաժ, միջազգային ներդրումային արբիտրաժ, միջազգային հանրային իրավունք և իրավունքի տնտեսագիտական վերլուծություն:

Ջեմմա Փանոյանը գերազանցությամբ ավարտել է Ռուսաստանի Դաշնության արտաքին գործերի նախարարության միջազգային հարաբերությունների Մոսկվայի պետական համալսարանի միջազգային իրավունքի ֆակուլտետը և ներկայումս ներգրավված է նույն համալսարանի մագիստրոսական ծրագրում (Միջազգային մասնավոր և քաղաքացիական իրավունքի ամբիոն), ինչպես նաև Մոսկվայի բարձրագույն տնտեսագիտական ինստիտուտի մագիստրատուրայի առաջին կուրսի ուսանող է (Ֆրանսիական գործարարական իրավունք):

Ջեմմա Փանոյանը համագործակցել է "White and Case"-ի մոսկովյան գրասենյակի, ՀՀ Սահմանադրական դատարանի, Կարմիր խաչի միջազգային կոմիտերի մոսկովյան գրասենյակի, Երևանի կոնյակի գործարանի հետ: Ինչպես նաև մասնակցել է միջազգային իրավունքի վերաբերյալ մի շարք ծրագրերի և դատախաղերի` Ֆ. Ջեսսափի անվան միջազգային իրավունքի դատախաղին միջազգային մրցափուլերին, Ֆ. Մարտենսի անվան դատախաղին:

Գիտական հետաքրքրության ոլորտներն են` միջազգային մարդասիրական իրավունք, միջազգային քրեական իրավունք, պետությունների և միջազգային կազմակերպությունների պատասխանատվություն, միջազգային բնապահպանական իրավունք, մշակութային ունեցվածքի միջազգային պաշտպանություն, միջազգային մասնավոր իրավունք:

Արևիկ Ստեփանյանը Հայաստանում ֆրանսիական համալսարանի մագիստրոս է: 2007 թ. մասնակցել է Թավթս համալսարանի Իրավունքի և դիվանագիտության Ֆլեթչեր դպրոցում իրականացվող միջազգային հարաբերությունների և իրավունքի բնագավառի խորացված վերապատրաստման ծրագրին:

Արեւիկ Ստեփանյանը ՀՀ արդարադատության նախարարության աշխատակազմի Մարդու իրավունքների եվրոպական դատարանի հետ կապերի վարչության առաջատար մասնագետ է: Մարդու իրավունքների եվրոպական դատարանում պաշտպանում է ՀՀ կառավարության շահերը: Բացի այդ, Հայաստանի ֆրանսիական համալսարանում դասավանդում է “Common Law” և "Business Common Law" առարկաները:

Նա ուսումնասիրում է մարդու իրավունքների պաշտպանության միջազգային իրավունքը, միջազգային գործարարական իրավունքը և անգլո-ամերիկյան իրավական համակարգը: Տիրապետում է հայերենին, ռուսերենին, անգլերենին, ֆրանսերենին, գիտի նաեւ գերմաներեն և իսպաներեն:

Սիրանուշ Սահակյանը գերազանցությամբ ավարտել է Երևանի պետական համալսարանի իրավագիտության ֆակուլտետի բակալավրիատը և մագիստրատուրան: Նա նաև Էսեքսի համալսարանի (Միացյալ Թագավորություն) մարդու իրավունքների մագիստրոսի աստիճան է ստացել: Ներկայումս Երևանի պետական համալսարանում դասավանդում է "Մարդու իրավունքների եվրոպական դատական պաշտպանություն" եւ "Եվրոպական դատարանի դատական պրակտիկան" առարկանները:

Սիրանուշ Սահակյանն աշխատել է մի շարք պետական և միջազգային կառույցներում, ինչպես նաև հասարակական կազմակերպություններում, մասնավոր իրավաբանական կազմակերպություններում, գիտահետազոտական կենտրոններում: Սիրանուշ Սահակյանն աշխատել է ՀՀ արդարադատության նախարարության Եվրոպական դատարանի հետ կապերի վարչությունում, Եվրոպայի անվտանգության և համագործակցության կազմակերպության ժողովրդավարական հաստատությունների և մարդու իրավունքների գրասենյակում, Միավորված ազգերի կազմակերպությում, "Սրետենկա-կոնսուլ" իրավաբանական գրասենյակում, Քաղաքացիական հասարակության ինստիտուտում:

Ներկայումս "Իրավունքների պաշտպանություն առանց սահմանների" հասարակական կազմակերպության նախագահն է: 2010 թվականի սեպտեմբերից միացել է “Լեգելատա” իրավաբանական գրասենյակի թիմին` ղեկավարելով նրա գործունեությունը մարդու իրավունքների պաշտպանության, միջազգային հանրային իրավունքի և վարչական իրավունքի ասպարեզներում:

Սիրանուշ Սահակյանն ուսումնասիրում է միջազգային իրավունքի մարդու իրավունքները, Մարդու իրավունքների եվրոպական դատական պաշտպանությունը, միջազգային հանրային իրավունքը, վարչական իրավունքը և քրեական արդարադատությունը: Հեղինակ է տասից ավելի գիտական հոդվածների և աշխատությունների: