English
ՀայերենԿրթաթոշակային դրամաշնորհների համար դիմելու գործընթացը
Համապատասխանության պայմանները
Դիմորդները պետք է լինեն ծագումով հայ, Հայաստանի քաղաքացի կամ ունենան հայկական արմատներ (խառնամուսնությունների զավակների համար)
"Լույս" հիմնադրամին դիմող ուսանողները պետք է լինեն ծագումով հայ, Հայաստանի քաղաքացի կամ ունենան հայկական արմատներ: Դիմորդները պետք է ներկայացնեն անձը հաստատող կամ այլ փաստաթուղթ, որ կապացուցի անմիջական հայկական արմատների գոյությունը: Խնդրում ենք ներկայացնել փաստաթղթեր, ինչպիսիք են ծննդյան, մկրտության կամ քաղաքացիության վկայականները, որոնք հավաստում են ուսանողի ծննդյան երկիրն ու ազգությունը:
Տարիքային պահանջներ
2012 թվականի ապրիլի 1-ի դրությամբ դիմորդը պետք է լինի առնվազն 18, բայց՝ ոչ ավելի քան 40 տարեկան:
Պարտականություններ
"Լույս" հիմնադրամն ակնկալում է, որ ուսանողներն իրենց արդյունավետ ներդրումը կունենան աշխարհում եւ ողջունում է նրանց քաղաքացիական ակտիվ մասնակցությունը Հայաստանի կյանքում: ՙԼույս՚ հիմնադրամի ծրագիրն ակնկալում է, որ ուսանողները նշանակալի դերակատարում կունենան հասարակության բարելավման գործում: Սա անպայմանորեն չի ենթադրում աշխատանք հանրային սեկտորում, սակայն հիմք է տալիս, որպեսզի ուսանողները մտավոր ու բարոյական տեսակետից ունակ լինեն առաջնորդի դեր ստանձնել իրենց ընտրած ոլորտում, ինչպես նաեւ՝ աշխարհի տարբեր ծայրերում հպարտորեն ներկայացնել Հայաստանի մշակույթը՝ իբրեւ դեսպաններ:
Դիմորդներից կպահանջվի դրսեւորել ազնվություն, հետաքրքրություն եւ հարգանք այլոց հանդեպ, առաջնորդելու ունակություն եւ հասարակությանը օգտակար լինելու ձգտում: Նրանցից պահանջվում է.
- Միշտ կապի մեջ եղեք: Մասնակցեք Երևանում գտնվող "Լույս"-ի օն-լայն ժողովներին:
- Մասնակցեք և ներկայացրեք առաջարկներ "Լույս"-ի "Զարգացնենք Հայաստանը" ծրագրի համար:
- Կիսեք ձեր գիտելիքն ու ոգևորությունը: Հայաստանում գտնվելու ընթացքում սեմինար անցկացրեք:
- Մենթոր դարձեք հայաստանցի երիտասարդների համար:
- "Լույս"-ի ծրագրերին մասնակցելիս հայերեն սովորեք և ծանոթացեք Հայաստանի մշակույթին:
- Տրամադրեք ձեր գիտական հրապարակումները` "Լույս"-ի կողմից հրատարակելու համար:
- Հյուրընկալեք "Լույս"-ի ուսանողներին, ովքեր կայցելեն ձեր համալսարան:
- Ներկայացրեք եռամսյակային հաշվետվություններ, դիտարկումներ ու առաջարկություններ:
- Միացեք կամ ստեղծեք հայ ուսանողների միություն կամ "Լույս"-ի ցանց այնտեղ, ուր սովորում եք:
- Որտեղ էլ լինեք, եղեք "Լույս"-ի դեսպանը եւ հայկական մշակույթի դեսպանը:
