Ծնվել եմ 1991թ. Գյումրիում: Շուտով տեղափոխվեցինք Մարալիկ: Այդ տարիներին սովորեցի, թե որքան կարևոր է կրթությունը հայերի և հատկապես փոքր քաղաքներում ու գյուղերում ապրող երեխաների համար: 2004թ. ընտանիքով տեղափոխվեցինք Երևան` հաճախելով Հակոբ Օշականի անվան թիվ 172 միջնակարգ դպրոցը:

Քիմիայի մի քանի դասագրքեր կարդալով` հասկացա, որ սիրում եմ գիտության այդ խորհրդավոր ճյուղը: Առաջին հաջողություններ նսպասեցնել չտվեցին. հաղթեցի Քիմիայի հանրապետական առարկայական օլիմպիադայում:

Արդեն այդ ժամանակ հստակ էր, որ ավելի բարձր նշաձողեր պետք է դնեմ իմ առջև:Ուստի լավագույն կրթական մթնոլորտ գտնելու հույսով եկա Անանիա Շիրակացու անվան ճեմարան: Այստեղ անցկացրած 2 տարիները բեղուն էին ոչ միայն ակադեմիական հաջողությունների տեսանկյունից, այլև այն առումով, թե ինչպես էր դպրոցը հասարակությանը պիտանի մարդ դաստիարակում, մարդկանց, ովքեր գնահատում են իրական գիտելիքը և պատրաստ են անընդհատ նվաճել գիտության նորանոր բարձունքները: Այս շրջանի մի քանի հաղթանակ նշեմ`

• 2-րդ մրցանակ,Քիմիայի հանրապետական օլիմպիադա, 2007 թ.
• Բրոնզե մեդալ, Մենդելեևյան միջազգային օլիմպիադա, Մինսկ, Բելառուս, 2007 թ.
• Արծաթե մեդալ,Քիմիայիհամաշխարհային օլիմպիադա, Մոսկվա, ՌԴ, 2007 թ.
• 1-ին մրցանակ,Քիմիայի հանրապետական օլիմպիադա, 2008 թ.
• Բրոնզե մեդալ, Մենդելեևյան միջազգայինօլիմպիադա, Տաշքենդ, Ուզբեկստան, 2008 թ.
• Բրոնզե մեդալ,Քիմիայի համաշխարհայինօլիմպիադա, Բուդապեշտ, Հունգարիա, 2008 թ.

Այս տարիներին անգամ մանակցել եմ Ռուսաստանի արտգործ նախարախության կազմակերպած նախկին ԽՍՀՄ երկրների Բաց օլիմպիադային` շահելով2-րդ և 3-րդ մրցանակներ:

“Սինոփսիս-Արմենիա” ընկերության անցկացրած մրցույթի շրջանակներում2008թ. արժանացա ՀՀ Նախագահի 1-ին կարգի մրցանակի “Լավագույն աշակերտ” անվանակարգում:Զուգահեռ մասնակցել եմ մի շարք հեռուստա- և ռադիոծրագրերի, մրցույթների ու միշտ բարձր արդյունքներ ապահովել:

Ճեմարանն ավարտել եմ գերազանցության ոսկե մեդալով 2008թ.:Նույն թվականին ընդունվել եմ Երևանի պետական բժշկական համալսարան`ստանալով բազում հիմնարար գիտելիքներ:

Դեռևս դպրոցական տարիներին, երբ մասնակցում էի տարբեր միջազգային օլիմպիադաների և հանդիպում արտասահմանցի երեխաների, հասկանում էի, որ երազանքներս իրագործելու և հայրենիքիս օգտակար լինելու միակ ճանապարհը արտերկրի լավագույն բուհերում սովորելն է:2011թ. ընդունվեցի աշխարհի մի շարք հեղինակավոր համալսարաններ և, վերջապես, որոշեցի կրթությունս շարունակել Մասաչուսեթսի տեխնոլոգիայի ինստիտուտում (MIT)`Կենսաբանություն և Ուղեղ ու ճանաչողական գիտություններ մասնագիտություններով: