Ծնվել եմ Հայաստանում 1990 թ-ին: 2000-2006 սովորել եմ Ա. Շիրակացու անվան ճեմարանում: 2006 թ-ին ընդունվել եմ Թաիլանդի Ռեգենտների դպրոց, որն ավարտել եմ բարձր գնահատականներով:

Ռեգենտների դպրոցում ակտիվ մասնակցություն եմ ունեցել արտադասարանային աշխատանքներին: Դպրոցը, լինելով միջազգային կազմակերպության անդամ, լայնածավալ գործունեություն էր տարածում` բարեգործական, ինչպես նաև ժողովրդավարական սկզբունքներ քարոզելով: 2007 թ-ին որպես այդ դպրոցի ներկայացուցիչ` մասնակցել եմ Հնդկաստանում կայացած միջազգային հավաքին, որտեղ ներկայացրել եմ "Աղքատությունը Հարավարևելյան Ասիայում" թեմայով ելույթ:

2008 թ-ին ավարտել եմ Ռեգենտների դպրոցը և ընդունվել Լոնդոնի համալսարանական քոլեջ (UCL)`ուսանելու արևելաեվրոպական քաղաքականություն: Քանի որ ի վիճակի չէի վճարել ուսման վարձը, համալսարանը երկու տարով հետաձգեց ուսումս:

Այդ երկու տարվա ընթացքում աշխատել եմ Հայաստանում, այդ թվում` "Մանանա" մանկապատանեկան կրթամշակութային կենտրոնում` որպես արտաքին հարաբերությունների համակարգող: Դասավանդել եմ անգլերեն և բիզնեսի հիմունքներ "Գլոբալ բրիջ" կրթօջախում: Բացի այդ, "Այսեկ" կազմակեչպության և "Պլան ինթերնեշընալ"-ի հետ վեց ամիս կամավորական սկզբունքով աշխատել եմ Չինաստանում: